انا خلصت امتحانات و خلصت معاها

عوده بعد طول غياب و انعزال عن العالم الخارجي
اولا كان بسبب امتحانات الميدترم اللي كانت اقرب للفينال
اول مره اهتم اوي كده بامتحانات ميدتيرم مش عارفه بالظبط ايه السبب في كده
يمكن عشان مكانش قدامي حل تاني غير اني احط كل همي في الكتب اللي قدامي و يا انا يا هي
على راي المثل مقدرش على ال.... اتشطر على ال.....
اهي المذاكره بقى كانت ال.... التانيه.. بس مش عاوزه افسر عشان ما تزعلش مني حضرتها و النتيجه تتطلع مش كويسه و لا حاجه..
ربنا يجعل كلامنا خفيف عليهم..
السبب التاني بقى خارج عن ارادتي و هو ان كابلات التليفونات بتاعة المنطقه اللي انا فيها اتسرقت بالكامل!!!
مش عارفه اللي بيسرقهم بيسرقهم ليه؟؟ دي حتة صفيحه على حسب ما بيقولوا!!
المهم اني خرجت من الامتحانات على المحضرات و السكاشن على طول مفيش و لا نص يوم اجازه مراعاة لظروف الطلبه المساكين، ابدا!!!!! احنا بنتدلع امتحانات ايه دي اللي تعبتنا، السنه قربت تخلص لازم نلحق نخلص..
لولا ان ضميري لسه صاحي و مانمش زي مخي ما كنتش رحت لا امبارح و لا النهارده و لا بكره و السبت الجاي كمان..
بس اعمل ايييه في الحاج ضميري صحته حلوه..

اشوفكوا قريب