ذهول و ملل و ياس مع انفجار داخلي

مش عارفه ليه بقالي كتير فعلا ما كتبتش
تقريبا مع بداية الدراسه مره تانيه و الروتين اليومي السخيف
حاسه ان يومي كله جري ورا محضرات و معامل الصبح و نوم فانتظار من غير فايده و نوم تاني
بس نهاري مش هو مشكلتي القاتله اليومين دول بالعكس، انا حاسه ان الترم ده افضل من اللي فاتوا
اللي فعلا بيعذبني هو الليل اللي لاول مره بقيت احس انه تقيل جدا على قلبي و بتمنى انه يمر بسرعه
مع اني طول عمري بقول اني كائن ليلي!
الليل كله انتظار انتظار و انتظار لشخص عمره ما بيجي و حتى لو جه
يعني كان وجوده غير حاجه؟! ابدا
بدات افقد الثقه في كل حاجه.. حتى في عقلي و قدرتي على التغلب على قلبي اللي موديني ورا الشمس..
اكتر من مره افتح المدونه و اقرر اني اكتب حاجه جديده
اكتب كلمتين
تلاته
سطرين
و امسحهم و اقفل المدونه خالص
مش عارفه و لا قادره اكتب و لا اتكلم
بس النهارده و رغم ان مفيش اي حاجه اتغيرت من الروتين اليومي
حسيت اني عاوزه اكتب بجد
يمكن لاني قرات شويه من رواية نون لسحر الموجي اللي برضو بقالي كتير سايباها و معرفش ليه..
و امبارح رجعت بعد غياب طووويل جدا للرسم
اخيرا رسمت يا جدعان
حسيت بعدها اني قابلت صديق قديم بحبه اوي و بقالي سنين ما شفتوش
شكله اتغير و انا كمان اتغيرت
بس لسه جميل زي ما هو

زي ما يكون الرسم و القراءه خرجوا شحنه كانت جوايه كاتمه على نفسي و حابسه الكلام جوه و مانعاه من الهروب..
اديني رجعت و اتكلمت و يا ريت ما كنش ازعجتكوا و يكون عدم وجودي كان افضل و لا حاجه!!! اياكم